Тибқи иттилои бадастомада, Ҳамроҳхон Зарифӣ, вазири собиқи корҳои хориҷии Тоҷикистон ба 27 сол зиндон маҳкум шудааст. Бар асоси қарори додгоҳ, амволи Зарифӣ мусодира мешавад.
Саидҷаъфар Усмонзода, раиси пешини Ҳизби демократ ва вакили порлумон ҳам 27 сол аз озодӣ маҳрум шудааст ва бо қарори додгоҳ амволаш мусодира мешавад.
Додгоҳ ҳамчунин Шокирҷон Ҳакимов, муовини аввали раиси ҲСДТ-ро барои 18 сол равонаи зиндон кардааст.
Аҳмадшоҳ Комилзода, муовини пешини раиси Ҳизби демократи Тоҷикистон ҳам 18 зиндонӣ шудааст.
Акбаршоҳ Искандаров, собиқ раиси Шӯрои олии Тоҷикистон ҳам ба 18 сол зиндон ва мусодираи як қисмати амвол, маҳкум шудааст.
Нурамин Ғанизода, сарҳанги бознишастаи амният 18 сол аз озодӣ маҳрум шудааст.
Абдулфайз Атоӣ, сардори пешини Раёсати ВКХ барои 17 сол равонаи зиндон шуд.
Додгоҳ Рухшона Ҳакимова, хабарнигори тоҷикро ва бародарзодаи Шокирҷон Ҳакимовро ба 8 сол зиндон маҳкум кардааст.
Вокуниши ин нафарон ба ҳукми додгоҳ феълан маълум нест. Чеҳраҳои шинохта дар сухани охиронашон дар додгоҳ худро бегуноҳ хонда, аз додгоҳ талаб карда буданд, ки онҳоро озод кунанд.
Парвандаи кӯшиши табаддулот ва ғасби қудрат дар Тоҷикистон дар моҳи июни соли 2024 бо боздошти раиси Ҳизби демократ ва вакили порлумон Саидҷаъфар Усмонзода оғоз шуд.
Додситонии кулли Тоҷикистон, масъули таҳқиқи парванда, бар рӯйи он муҳри махфӣ зада, ба хабарнигорон маълумот намедиҳад. Аммо ин ниҳод рӯзи 14-уми июни соли 2024, баъд аз боздошти вакили порлумон Саидҷаъфар Усмонзода, гуфта буд, ки нақшаи ғасби ҳукумат дар Тоҷикистон тӯли чанд сол омода шудааст.