Низом Мирзозода гуфт, ҳоло арзиши ҳар метри мураббаъ манзил дар пойтахт ба ҳисоби миёна 780 доллари Амрико (8470 сомонӣ)-ро ташкил медиҳад.
Ба қавли ӯ, нархи хона гарон шудааст ва ин аз харҷи ширкатҳои бинокор ва талаботи бозор вобаста аст.
"Нарх дар минтақаҳо ва шаҳру ноҳияҳои ҷумҳурӣ фарқ мекунанд. Вобаста аз хараҷоте, ки соҳибкор мекунад. Имрӯз ба ҳисоби миёна 705 доллари Амрико дар сатҳи ҷумҳурӣ, 780 доллар дар Душанбе аст," – гуфт Низом Мирзозода рӯзи 3-юми феврал дар нишасти хабарӣ.
Раиси Кумитаи сохтмону меъморӣ соле пеш гуфта буд, ки як метри мураббаъ хона дар шаҳри Душанбе қариб 7400 сомонӣ (673 доллар) аст.
Баъзе аз сокинон шикоят мекунанд, ки нархи манзил дар Тоҷикистон, хусусан дар пойтахти кишвар, гарон буда, қобилияти хариди онро надоранд.
Бонкҳо барои гирифтани хона ба мардум қарзи дарозмуддат ё ипотека пешниҳод мекунанд, вале бо шарту баҳрае, ки соҳиби хона шудан барои иддае фақат орзу мемонад.