Дар пайи як тасодуфи роҳ дар ноҳияи Ёвон панҷ кас, аз ҷумла ду кӯдак ҷон бохтаанд. Ҳодиса баъд аз нимирӯзии 25-уми апрел рӯй додааст.
Дафтари матбуоти Вазорати корҳои дохилӣ рӯзи 28-уми апрел гуфт, Орзу Калтаев, сокини 31-солаи ноҳияи Ёвон, “аз уҳдаи идораи мошин набаромада, ба канали обгузар сарозер шуд”.
Дар ин ҳодиса модару ҳамсар, ду писар ва янгаи ронанда ба ҳалокат расидаанд. Онҳо аз 2 то 59 сол доштанд. Мақомот дар бораи вазъи ронанда чизе нагуфтанд.
Дар наворҳои ҳодиса, ки ба шабакаҳои иҷтимоӣ роҳ ёфт, дида мешавад, ки чанд зан ва кӯдаки оғушта дар хун рӯйи роҳ хобидаанд.
Дар як ҳафтаи охир ин сонеҳа ё тасодуфи дувуми мудҳиш дар роҳҳои вилояти Хатлон аст.
Рӯзи 24-уми апрел дар канори шаҳри Кӯлоб се мошин бо ҳам бархӯрда, Муҳиддин Олимови 30-сола ва Амирҷон Давлатови 29-сола бо осебҳои шадид дар шуъбаи эҳё бистарӣ гаштанд.
Дар навори дурбинҳои сари роҳ дида мешавад, ки як мошин бо суръати баланд ба самти муқобили роҳ баромада, бо мошини "Тангем" ва як "Опел" бархӯрдааст.
Ҳар сол дар садамаҳои нақлиётӣ дар Тоҷикистон садҳо кас куштаву маҷруҳ мешаванд. Риоя накардани қоидаҳои роҳ, ҳаракат бо суръати баланд ва мошинҳои куҳнаву роҳҳои ноҳамвор аз сабабҳои маргумири зиёд дар роҳҳо номбар мегардад.
Навор дар Инстаграм: