Эмомалӣ Раҳмон дар паёме ба Девони Имомати Исмолия навишт, "шодравон бо талошҳои пайвастааш дар роҳи ҳифзи сулҳу субот, пешрафту нумӯи ҷаҳони ислом ва татбиқи ҳадафҳои рушди умум соҳиби мақому манзалати хосса гардидааст."
"Вобаста ба ин, мехоҳам саҳми ӯро дар пешбурди ҳамкории созанда бо Ҷумҳурии Тоҷикистон таъкид намоям," – афзудааст ӯ рӯзи 5-уми феврал.
Шоҳзода Карим Оқохони чорум рӯзи чоруми феврал дар 88-солагӣ дар Лиссабони Португалия даргузашт. Ӯ 68 сол бар тахти имомат нишаста буд.
Бори охир дар моҳи апрели соли 2012 ба Тоҷикистон омадааст. Дар соли 2022 ду бор дар пайванд ба ҳодисаҳои Бадахшон изҳорот дода, ибрози нигаронии худро баён дошта буд.
Оқохони чор рӯзи 13-уми декабри соли 1936 дар Швейтсария дар хонаводаи Шоҳзода Алӣ Салмонхон ва бону Тоҷуддавла Алихон ба дунё омада, замони кӯдакиро дар Кения гузарондааст. Сипас 9 сол дар мактаби Ле Розеи Швейтсария таҳсил намуда, соҳиби дипломи таърихи Исломи Ҳарвард шуд. Дар 21-солагӣ, пас аз бобояш Султон Муҳаммадшоҳ Оқохони севум, пешвои рӯҳонии исмоилиёни ҷаҳон шуд. Номи ҷойнишини ӯ ҳанӯз эълон нашудааст.