Мария Захарова, сухангӯи ВКХ Русия рӯзи 6 феврал гуфт, дар ин мулоқот “ҷараёни иҷрои созишномаҳои вобаста ба ҳамкориҳои шарикӣ, ҳамкориҳои стратегӣ ва дигар масоили вобаста ба робитаҳои Тоҷикистону Русия баррасӣ мешаванд”. Ӯ таъкид кард, ки “таваҷҷӯҳи махсус ба тақвияти ҳамкорӣ дар риштаҳои амнияту дифоъ ва соҳаҳои башариву муҳоҷират равона мешавад”.
Дар ин вохӯрӣ барномаи ҳамкориҳои вазирони корҳои хориҷии Тоҷикистон ва Русия барои солҳои 2025 то 2026 ҳам имзо хоҳад шуд.
Ҷузъиёти аз ин беш нашр намешавад, вале ин мулоқот дар ҳоле барпо хоҳад шуд, ки дар робитаҳои Тоҷикистону Русия мушкилоте вуҷуд доранд. Соли гузашта дар пасманзари ҳамла ба толори консертии “Крокус” ва муттаҳам шудани асосан шаҳрвандони Тоҷикистон дар ташкили он, Русия даст ба ихроҷу таъқиби даҳҳо ҳазор муҳоҷирон, аз ҷумла тоҷикистониён зад.
Кор то ҷое расид, ки чандин вазорати дахлдор дар Тоҷикистон бо нашри изҳороти расмӣ аз шаҳрвандон тақозо карданд, ки муваққатан аз сафар ба Русия даст кашанд. Масъулони идораи Омбудсмен аз поймол шудани ҳуқуқи муҳоҷирон ва беҷавоб мондани муроҷиатҳои онҳо барои мурооти ҳуқуқи тоҷикистониён хабар доданд.
Ҳанӯз ҷониби Тоҷикистон дар бораи баргузор шудани мулоқоти Муҳриддин ва Лавров хабари расмӣ нашр накардааст. Вале тибқи нақшаи нишастҳои матбуотии ниҳодҳои давлатӣ барои нимаи аввали соли 2025, рӯзи 14 феврал дар Душанбе қарор аст мақомоти ВКХ-ии Тоҷикистон дар бораи фаъолияти ин ниҳод дар соли 2024 дар баробари матбуот гузориш диҳанд. Акнун маълум нест, ки оё дар ин нишаст Сироҷиддин Муҳриддин ҳам иштирок мекунад на.
ИНЧУНИН, БИХОНЕД:
Таъсири таҳримҳои Амрико ба зидди Русия то Тоҷикистон мерасад?"Эй Худо, кош, сабабгори ҳодиса тоҷик набошад"4 созишнома дар бахши муҳоҷират. Нақшаи Тоҷикистон барои ИДМ