Дар чанд ҷумла
Посухи Сироҷиддин Муҳриддин ба мушкили аккредитатсияи хабарнигорони Озодӣ
Сироҷиддин Муҳриддин, вазири умури хориҷии Тоҷикистон, рӯзи 10-уми декабр дар як нишасти матбуотӣ дар Брюссел ба суолҳо дар бораи мушкили аккредитатсия ё парвонаи кори хабарнигорони Радиои Озодӣ посух дод. Ҳоло 11 хабарнигор ва корманди фаннии Радиои Озодӣ дар Душанбе аз ҳаққи кор маҳруманд.
Вазири умури хориҷии Тоҷикистон гуфт, “имсол ду дафъа бо Ҷейми Флай, президенти Радиои Аврупои Озод/Радиои Озодӣ мулоқот доштем. Моҳи октябр эътиборномаи ҳафт хабарнигор ва корманди фаннии Бахши Тоҷикии Радиои Озодиро тамдид кардем. Чаро ин вақти фарқкунанда гирифт ва шабеҳи дигар кишварҳо нест? Барои он ки муқаррароти кишвар чунин аст. Ҳар кишвар муқаррароти худро дорад."
Рӯзи 31-уми октябр, пас аз баёнияҳои бешумори созмонҳои байнулмилалӣ ва ватанӣ Вазорати умури хориҷии Тоҷикистон ба 6 хабарнигор парвонаи нимсола ва ба як нафар семоҳа дод. Мудирияти Радиои Аврупои Озод/Радиои Озодӣ дода шудани ин ҳафт парвонаи корро "назарфиребӣ" номид.
Сироҷиддин Муҳриддин дар идомаи суҳбаташ дар бораи аккредитатсияи хабарнигорон ба вазъи амниятӣ дахл кард ва гуфт, “Шумо медонед, мо рӯбарӯ бо Афғонистоне ҳастем, ки аз он ҷо мушкилоти зиёде таҳдид мекунад. Ва шумо медонед, ки дар муддати кӯтоҳи истиқлоли худ мо ҷанги шаҳрвандӣ доштем ва омилҳои зиёди дигаре ба амният ва суботи кишвар таъсир мекунанд. Аз ҳамин сабаб нақши васоити ахбори ом дар кишвар хеле муҳим аст. Ва журналистон ва намоянагони матбуот бояд ҳамаи фаъолиятҳои худро дар доираи қонунҳои мавҷудаи миллӣ анҷом диҳанд.”
Вазири умури хориҷии Тоҷикистон нагуфт, ки кай ба хабарнигорону кормандони фаннии Радиои Озодӣ парвонаи кор дода хоҳад шуд, вале афзуд, “мо бо хабарнигорон ва намояндагони Радиои Аврупои Озод/Радиои Озодӣ аллакай баҳсҳо кардем ва бо онҳо бисёр ҳамкории мусбат дорем. Мо беҳтарин талошамонро барои ҳамкории беҳтари оянда бо ин радио хоҳем кард."
Дар оғози моҳи ноябри имсол президенти Радиои Аврупои Озод/Радиои Озодӣ Ҷейми Флай бо раиси ҷумҳури Тоҷикистон Эмомалӣ Раҳмон мулоқот кард ва ду тараф вазъ ва шароити кори хабарнигорон ва кормандони Радиои Озодиро дар Тоҷикистон баррасӣ намуданд.
Қаблан аъзои Сенат, палатаи болоии порлумони Иёлоти Муттаҳидаи Амрико ва ду узви Конгресси Амрико аз мақомоти Тоҷикистон даъват карданд, ки масъалаи додани иҷозатномаи кор ба кормандони Бахши тоҷикии Радиои Аврупои Озод/Радиои Озодӣ дар Душанберо бар асоси қонунҳои дохилӣ ва конвенсияҳои байналмилалӣ баррасӣ ва ҳал кунанд.
Бори авал нест, ки раванди дарёфти иҷозатномаи кор боиси нигарониҳо мешавад. Дар соли 2016 низ пас аз нашри як мақола дар мавриди мақоми нави яке аз духтарони раиси ҷумҳур Эмомалӣ Раҳмон дар Вазорати умури хориҷӣ, ин вазорат аккредитасияи шаш корманди Радиои Озодиро бозхонд карда буд.
Радиои Озодӣ яке аз охирин манбаъҳои хабарии мустақил аст, ки бо гузориш додан аз воқеаҳое, ки расонаҳои давлатӣ аз онҳо хабар намедиҳанд, шунаванда ва бинандаи бешумор дорад. Шабакаи Ютюби он бо тақрибан 900 000 обуначӣ ва 200 миллион биниши видеоҳояш дар як соли гузашта дар Тоҷикистон маъруф аст. Сафҳаи фейсбукии он 184 000 пайрав дошта, танҳо видеоҳои он дар як сол 14 миллион бор дида шудаанд.
Ҳамаи хабарҳои имрӯзро дар инҷо бихонед
Пирӯзии шатранҷбозони навраси Қазоқистон дар Душанбе
Мусобиқоти қаҳрамонии шоҳмоти Осиёи Ғарбӣ миёни кӯдакону наврасон, ки дар маҷмааи варзишии “Кохи Олимп”-и шаҳри Душанбе 10 рӯз идома кард, бо пирӯзии мунтахаби Қазоқистон ба поён расид.
Ба итттилои сомонаи расмии Федератсияи шоҳмоти Тоҷикистон, мусобиқот бо иштироки беш аз 400 шатранҷбоз аз 13 кишвар мувофиқи синну соли иштироккунандагон дар шаш гурӯҳи аз 8 то 18-сола дар се намуд – рапид (зудбозӣ), блитс (барқосо) ва шоҳмоти маъмулӣ (классикӣ) - сурат гирифт.
Дар мусобиқот шатранҷбозони навраси Қазоқистон бо касби 39 медал (16 тилло, 9 нуқра и 14 биринҷӣ) дар байни дастаҳо ғолиб шуда, аз мунтахабҳои пурқуввати Узбекистону Ҳиндустон пеш гузаштанд.
Дар байни шатранҷбозони тоҷик нахуст Пайрав Қодирӣ дар мусобиқа байни наврасони то 14-сола дар шоҳмоти сареъ ё рапид бо касби 6 имтиёз аз 7 бозӣ соҳиби нишони нуқра гардид.
Дар шатранҷи барқосо ё блитс шатранҷбозони тоҷик 4 медал гирифтанд. Дар рақобатҳои инфиродӣ Ҷалолиддин Илҳомӣ дар байни 18-солаҳо бо касби 6,5 имтиёз аз 9 бозӣ бо медали нуқра сарфароз гашт.
Дар сабқати даставӣ байни 18-солаҳо тими Тоҷикистон дар ҳайати Ҷалолиддин Илҳомӣ, Эҳсон Ҷумаев, Бузургмеҳр Нурализода бо медали биринҷӣ мукофотонида шуд.
Дар байни 14-солаҳо низ дастаи Тоҷикистон дар ҳайати Пайрав Қодирӣ, Давид Наимов, Назар Ғафуров мақоми сеюмро касб кард.
Медали дигари биринҷиро дастаи Тоҷикистон дар миёни ҳаштсолаҳо дар ҳайати Муродалӣ Сайфиев, Идрис Шамсов, Ғайратҷони Дилмурод соҳиб шуд.
Дар шатранҷи классикӣ ё маъмулӣ мунтахаби Тоҷикистон ду медали нуқра ва ду биринҷӣ гирифт.
Бар асоси натиҷаҳои мусобиқот шатранҷбозон имкон пайдо карданд, ки рейтинги худро баланд бардоранд ва унвонҳои байнулмилалӣ ба даст оранд.
Фиреб ва истисмори як зани тоҷик аз ҷониби ҳамватанаш дар Русия
Як зани тоҷикро дар Русия ҳамватанони худаш мавриди истисмори меҳнатӣ қарор доданд. Ин зан 46-сола сокини ноҳияи Рӯдакӣ мебошад.
Вазорати корҳои дохилии Тоҷикистон мегӯяд, ки "Раҷабалӣ", як марди 28-сола аз ноҳияи Варзоб дар фабрикаи пойафзолбарории шаҳри Богдановичи вилояти Свердлови Русия моҳи апрели соли гузашта ин занро бо баҳонаи кор даъват мекунанд ва мунтазам ӯро бе пул кор мефармояд.
Ба иттилои Вазорат, ӯ шиноснома ва дигар ҳуҷҷатҳои ин занро аз дасташ гирифта, гаштугузорашро низ дар ин кишвар маҳдуд мекунад.
Ҳоло нисбати гумонбаршаванда парвандаи ҷиноятӣ оғоз шуда, тафтишот идома дорад.
Мақомот аз ному насаби ин зан ва боздошти гумонбар хабар надодааст. Маълум нест, ки ин зан чӣ гуна ба ватан баргашта, ба мақомот шикоят бурдааст.
Бо мақсади таъмини рӯзгор ҳамасола садҳо ҳазор тоҷик ба Русия ба муҳоҷират мераванд. Баъзе аз онҳо мегӯянд, дар аксари маворид аз ҷониби ҳамватани худ ба доми фиреб меафтанд ва ё мавриди азият қарор мегиранд.
Парванда алайҳи чанд корманди милиса барои "қаллобӣ"
Оҷонси назорати давлатии молиявӣ ва мубориза бо коррупсияи Тоҷикистон нисбати чанд корманди милиса бо гумони "қаллобӣ", парвандаи ҷиноӣ боз кардааст. Дар ин бора Оҷонсӣ 30-юми апрел дар саҳифаи "Фейсбук"-и худ хабар додааст.
Ба иттилои ин ниҳод, Абдуллозода У.Н., як корманди Вазорати корҳои дохилӣ дар ҳамоҳангӣ бо шуморе аз кормандони дигари ин ниҳод, аз як шаҳрванд барои аз ҷавобгарӣ озод кардани бародараш, 200 ҳазор сомонӣ талаб кардааст.
Ба иттилои манбаъ, Абдуллозода тариқи миёнаравҳо аз ин шаҳрванд 190 ҳазор сомонӣ гирифтааст.
Ҳоло ба гуфтаи Оҷонсӣ, нисбати Абдуллозода ва дигарон парванда оғоз ва ба додгоҳ ирсол шудааст. Аммо маълум нест, ки Абдуллозода ҳоло дар озодӣ аст ё дар боздошт.
Назари Абдуллозода, наздикон ва вакили дифоаш ба ин иттиҳом маълум нест.
Бо вуҷуди, он ки дар гузориш ба афроди дигар ҳам ишора шуда, аммо аз онҳо ном бурда нашудааст
Номи милиса, ҳомии ҳуқуқу масъули тартибот, дар солҳои охир борҳо дар қазияҳои марбут ба фасоди молӣ зикр шудааст.
1110 нафар – омори "зархаридон"-и узбекистонӣ дар ҷанги Украина
Шумораи шаҳрвандони Узбекистон, ки аз соли 2022 то январи соли 2025 аз тарафи Русия дар Украина ҷангидаанд, дар миёни кишварҳои дигари Осиёи Марказӣ рекордӣ будааст.
Бино ба рӯйхати “Зистан мехоҳам” (Хочу жит), ки тарҳи давлатии Украина аст, 1110 шаҳрванди Узбекистон ба таври қарордодӣ ба сафи нерӯҳои мусаллаҳи Русия пайваста, 109 нафари онҳо кушта шудаанд. Рӯйхат рӯзи 30-юми апрел нашр шуд.
Ба гуфтаи муаллифон, ин рӯйхат пурра нест ва бо шумули узбекистониҳое, ки шиносномаи русӣ доранд, теъдоди воқеии зодагони Узбекистон дар ҷанг метавонад ба чандин ҳазор нафар расад.
Бино ба ҳисоби онҳо, ҷавонтарин зархариди узбек дар артиши Русия 21-сола ва калонсолтарини онҳо 62-сола будааст. Яке аз зархаридон пас аз ҳашт рӯзи бастани қарордод кушта шудааст.
Муҳаққиқони тарҳи “Зистан мехоҳам” мегӯянд, қиссаи ҷалби зодагони Узбекистон ва Тоҷикистон ба ҷанг ба ҳам монанд аст. Сафи муҳоҷирони узбек дар Русия кам намешаванд ва ҳукумати Русия ҳам аз ин вазъ ба фоидаи худ истифода бурда, муҳоҷиронро чун барраи қурбонӣ ба хати пеши ҷанг мефиристад.
Тарзи ҷалби муҳоҷирон аз Осиёи Марказӣ ҳам нав нест. Онҳоро дар ҷараёни амалиёт боздошт карда, бо таҳдиди рондан аз Русия ба бастани қарордод маҷбур мекунанд.
Ҳафтае пеш тарҳи “Зистан мехоҳам” омори зархаридони тоҷикро дар сафи нерӯҳои мусаллаҳи Русия нашр кард. Ба ҳисоби ин тарҳ, 931 зодаи Тоҷикистон аз соли 2022 то моҳи январи соли 2025 ба таври қарордодӣ аз тарафи Русия ба зидди Украина ҷангидаанд.
Бар асоси феҳраст, аз 931 зодаи Тоҷикистон то моҳи январи соли 2025-ум 196 нафар кушта шудаанд.
Ҷустуҷӯйи Радиои Озодӣ нишон дод, ки баъзе аз онҳое, ки номашон дар рӯйхат оварда шудааст, дар Русия ба ҷавобгарии маъмурӣ кашида шудаанд ё алайҳи онҳо санад тартиб дода шуда, бо таҳдид ва тарсондан ба ҷанг бурда шудаанд. Бархеи дигар ҳам аз зиндон ба ҷанг бурда шудаанд.
Дар рӯйхати нав онҳое низ ҳастанд, ки тавассути ширкати муздурони "Вагнер" ба сафи артиши Русия ҷалб шудаанд, аммо теъдоди дақиқи зодагон ё шаҳрвандони Тоҷикистон, ки ба ҷанги Русия зидди Украина ҷалб шудаанд, маълум нест.
Изҳори нигаронии як созмони мухолифи ҳукумати Тоҷикистон аз хатари шохаи "Хуросон"
Ҷунбиши ислоҳот ва рушд, созмони мухолифи ҳукумати Тоҷикистон, аз “хатари афзоянда”-и шохаи “Хуросон”-и ДОИШ ё гурӯҳи террористии “Давлати исломӣ” ба Тоҷикистон ва кишварҳои ҳамсояаш изҳори нигаронии ҷиддӣ кардааст.
Ба гузориши созмонҳои байнулмилалӣ, аз ҷумла Шӯрои Амнияти Созмони Милал, ҷангҷӯёни ҳалқаи “Хуросон” асосан дар Афғонистон паноҳгоҳ доранд.
Ҷунбиши ислоҳот ва рушд, қароргоҳаш дар Амстердам, рӯзи 30-юми апрел дар эъломияе гуфт, “шумораи зиёди ҷангҷӯёнро шаҳрвандони Тоҷикистон ташкил медиҳанд.”
Ҳарчанд созмон омори дақиқе наовард, ин вазъро “натиҷаи бевоситаи сиёсати саркӯбгаронаи низоми феълӣ дар Тоҷикистон” донистааст, ки “ҷавононро аз ҳаққи зиндагии шоиста, озодӣ ва адолат маҳрум кардааст.”
“Бекории густарда, худсариҳои мақомот, набудани дурнамои рушд ва таъқибҳои шадиди сиёсӣ дар Тоҷикистон ҳазорон ҷавони ноумедро ба оғӯши гурӯҳҳои ифротӣ андохтаанд,” – гуфта шудааст дар эъломия.
Ин изҳорот дар замоне нашр шуд, ки ба хабари Ҷунбиши ислоҳот ва рушд, раҳбараш Шарофиддин Гадоев бо сафари корӣ дар Кобул, пойтахти Афғонистон, қарор дорад.
Мақсади сафари ӯ “таҳияи механизмҳои муштарак барои таъмини субот, тавсеаи муколамаи мустақим ва пурмазмун байни ҷомеаҳои шаҳрвандии Тоҷикистону Афғонистон ва тақвияти равобити бародаронаи байни мардуми ду кишвар аст” гуфта шудааст.
Тоҷикистон дар миёни кишварҳои Осиёи Марказӣ дарозтарин сарҳадро бо Афғонистон дорад, ки 1344 километр аст. Мақомоти Тоҷикистон борҳо гуфтаанд, ки дар наздикии марз гурӯҳҳои ифротӣ, аз ҷумла ҳалқаи “Хуросон”-и ДОИШ ҳузур доранд, ки дар байни онҳо ифротгароёни тоҷик ҳам ҳастанд.
Шохаи “Хуросон”-и гурӯҳи ба ном “Давлати исломӣ” дар соли 2015 аз вуҷуди худ хабар дод ва дар солҳои охир масъулияти чанд ҳамлаи маргборро дар дохил ва берун аз Афғонистон ба дӯш гирифт.
Вазорати корҳои хориҷии Иёлоти Муттаҳида қаблан эълон карда буд, ки барои ҳар иттилое, ки битавонад сабаби барҳам задани шабакаи молии шохаи “Хуросон” шавад, 10 миллион доллар инъом медиҳад.
Ба 20 муҳоҷири тоҷик иҷоза надодаанд, ки вориди Маскав шаванд
Марзбонони Русия ба 20 муҳоҷири тоҷик дар фурудгоҳи “Внуково”-и Маскав иҷозаи вурудро надоданд.
Яке аз муҳоҷирон бо ирсоли навор ба Радиои Озодӣ гуфт, ки онҳо рӯзи 29-уми апрел аз Душанбе парвоз карда буданд.
Мақомоти Русия сабаби роҳ надодани 20 муҳоҷир аз Тоҷикистонро шарҳ надодаанд.
“Иҷозат надоданд, ки ба Маскав дароем. Як рӯз аст, ки дар замини холӣ хобем. Сабабашро намегӯянд," -- гуфт ӯ.
Дар гузашта онҳоеро, ки аз фурудгоҳ иҷозаи ба Русия ворид шудан надода буданд, баъди се рӯз ё як ҳафта ба Тоҷикистон пас гардонда буданд.
Дар бештари маврид мақомоти Русия далели ихроҷи муҳоҷиронро шарҳ намедиҳанд.
Додситонии кулли Тоҷикистон дар нишасти матуботии аввали имсол эълон кард, ки дар соли 2024 беш аз 30 ҳазор муҳоҷири тоҷик аз Русия ронда шудаанд.
Ҳомиёни ҳуқуқ мақомоти Русияро барои поймоли ҳуқуқи муҳоҷирон, фароҳам накардани шароити дурусти кору зиндагӣ ва фишору азият танқид мекунанд.
Аз бозгашти Трамп ба Кохи Сафед 100 рӯз гузашт
Доналд Трамп, раисҷумҳури Амрико, садрӯзагии бозгашти худро ба Кохи Сафед дар миёни тарафдоронаш таҷлил кард ва бо истифода аз ин фурсат бори дигар аз Ҳизби демократ интиқод кард.
Ӯ ҳамчунин аз сиёсатҳои сахтгиронаи худ дар баробари муҳоҷират сухан гуфт ва афзуд, ки дар 100 рӯзи гузашта ваъдаи берун кардани муҳоҷирони ғайриқонуниро амалӣ намудааст.
Трамп дар интихоботи президентии соли 2024 дар Амрико баранда шуд ва бори дувум ба Кохи Сафед роҳ ёфт.
Ӯ рӯзи 20-уми январи соли ҷорӣ савганди президентӣ ёд кард.
Дар 100 рӯзи гузашта Доналд Трамп бо содир кардани фармонҳо ва тасмимҳои ҷанҷолбарангез дар сархати расонаҳои ҷаҳон қарор гирифт, аз ҷумла ҷорӣ кардани боҷҳои гумрукии бисёр вазнин бар молу колоҳои воридотии тақрибан ҳама кишварҳои ҷаҳон, ки бо вокуниши тунд аз сӯи аксари ин кишварҳо рӯбарӯ шуд.
Парвандаи гумонбарони ҳамла ба "Крокус" моҳи июн ба додгоҳ меравад
Парвандаи гумонбарони ҳамла ба "Крокус Сити Ҳол"-ро моҳи июн ба додгоҳ мефиристанд. Дар ин бора хабаргузории русии ТАСС бо такя ба як манбаъ аз мақомоти ҳифзи ҳуқуқ хабар додааст.
Ба иттилои ин расона, парвандаро Додгоҳи ҳарбии 2-юми ҳавзаи ғарбӣ баррасӣ хоҳад кард. ТАСС хабар додааст, ки феълан парвандаи чаҳор нафар дар миёнаҳои моҳи июн барои баррасӣ ба додгоҳ ирсол мешавад.
"Дар ин парванда маводи зиёде, аз ҷумла маълумот дар бораи ҳолатҳои ҳамла ба "Крокус" мавҷуд аст. Пас аз баррасии онҳо, парванда ба додситонӣ ва баъдан ба додгоҳ ирсол мешавад",- гуфта шудааст дар хабар.
Мақомоти Русия бори аввал аз фиристодани парванда ба додгоҳ хабар медиҳанд. Ин дар ҳолест, ки Кумитаи тафтишоти Русия моҳи феврали имсол таҳқиқи парвандаи ҳамлаи хунин ба толори консертии "Крокус"-ро ба анҷом расонд. Ба гуфтаи вакилони дифои гумонбарон, парванда мебоист то моҳи март ба додгоҳ мерафт.
Ҳамла ба "Крокус Сити Ҳол" дар наздикии Маскав шаби 22-юми марти соли гузашта сурат гирифт. Дар робита ба ин ҳодиса ҳудуди 20 кас боздошт шуданд, ки 14 нафарашон зодагони Тоҷикистон ҳастанд. Ин афрод аз моҳи марти соли гузашта дар ҳабс ҳастанд. Шароити нигаҳдории гумонбарон дар боздоштгоҳ маълум нест.
“Аз ҳарду кишвар як хоҳиши сода дорем: Ба ҷанг дода нашавед”
Пас аз ҳодисаи рӯзи 22-юми апрел дар Кашмир таниш миёни Ҳиндустону Покистон афзоиш ёфта, нигарониҳо аз ҷанг миёни ду кишвари дорои силоҳи ҳастаӣ бештар гаштааст.
Ҳафтаи гузашта гурӯҳи мусаллаҳе дар минтақаи сайёҳии Пахалгамии Кашмир, ки зери назорати Ҳиндустон аст, 26 сайёҳро куштанд ва 17 танро захмӣ карданд.
Ҳиндустон инро кори дасти гурӯҳҳои зери назорати Покистон номид. Покистон рад кард, аммо хатари эҳтимолии ҷанг аз байн нарафтааст.
Ин вазъ бештар зиндагии мардум, аз ҷумла кишоварзонро хароб кард. Деҳқонони деҳаи Вагаҳ аз тарси ҷанги эҳтимолӣ ҳанӯз ба ҷамъоварии ҳосил оғоз накардаанд. Мақомот ҳам иҷоза намедиҳанд, ки онҳо дар саҳро кор кунанд.
Деҳқон Муҳаммад Адолат Сардор гуфт: "То гандум ба ҳосил расидан мо шаш моҳ заҳмат мекашем, об медиҳем, вале саривақт нағундоштани ҳосил зарари зиёд меорад. Аз ҳарду кишвар як хоҳиши сода дорем: Ба ҷанг дода нашавед. Ин беҳтарин кор барои ҳама аст”.
Кишоварзон нигаронанд, ки тӯлонӣ шудани маҳдудият ба онҳо зиёни ҷуброннопазир мерасонад.
Муҳаммад Зишан, кишоварз, гуфт, “вақти ҳосилғундорӣ мегузарад, вале ҷавонони мо дар кӯчаҳо ба бозӣ машғуланд. Маҳдудият ба ҳама зиён мерасонад.”
Ҳиндустону Покистон минтақаи Кашмирро аз худ медонанд ва қисматҳое аз онро ду кишвар назорат мекунанд. Солҳост, ки вазъ дар ин минтақа ҳассос аст ва хатари ҷанг миёни ду кишварро, ки бомбаи атомӣ доранд, бештар мекунад.
Видеоро дар инҷо бинед:
Кумита: зоирони бе иҷозатномаро "ҷаримаҳои сангин" интизор аст
Кумитаи дин ва танзими ҷашну маросими Тоҷикистон рӯзи 29-уми апрел бо нашри як изҳорот аз сокинони кишвар хостааст, ки барои адои ҳаҷ танҳо аз роҳҳои қонунӣ сафар кунанд ва аз талоши вуруд ба Макка ва дигар мавзеъҳои муқаддас бе иҷозатнома худдорӣ варзанд.
Ба иттилои Кумитаи дан, кишвари мизбони ин маросим, яъне Арабистони Саудӣ ҳушдор додааст, шахсонеро, ки бе иҷозатнома дар маросими Ҳаҷ-2025 иштирок мекунанд, "ҷаримаҳои сангин" интизор аст.
Дар изҳороти Кумитаи дин бо такя ба иттилои ВКД-и Арабистони Саудӣ гуфта мешавад, ки аз 29-уми апрел то анҷоми мавсими ҳаҷ барои афроде, ки талош мекунанд ғайриқонунӣ ба Макка ва дигар мавзеъҳо, чун Мино, Арафот ва Муздалифа ворид шаванд, то 20 ҳазор риёл, муодили 5400 доллар, ҷарима таъйин шудааст.
Ин изҳорот меафзояд, барои касоне, ки бо воситаи визаи зиёрат дар интиқол, паноҳ додан ё кумак расондан ба афроди поймолкунандаи тартиби ҳаҷ саҳм мегиранд, ҷарима то 100 000 риёл, баробар ба 27000 доллари амрикоӣ, пешбинӣ шудааст.
Ҳамчунин афроде, ки ғайриқонунӣ дар Макка мемонанд, дар сурати боздошт ихроҷ гардида, то 10 сол аз ҳаққи даромадан ба қаламрави Саудӣ маҳрум мешаванд. Ҳамин тариқ мошинҳое, ки барои интиқоли ғайриқонунии ин афрод истифода мешаванд, бо қарори додгоҳ мусодира карда мешаванд.
Бар асоси хабари ин вазорат, афроде ҳам, ки бе иҷозатнома дар ҳоли ҷобаҷойи зоирон дар меҳмонхонаҳо ва дигар мақонҳои иқомати ҳоҷиён, боздошт шаванд, то 100 ҳазор риёли саудӣ, баробар ба 27000 доллар, ҷаримаи нақдӣ хоҳанд шуд.
Маросими ҳаҷҷи соли 2025 дар даҳаи аввали моҳи июн баргузор хоҳад шуд. Гусели зоирони тоҷик барои адои ҳаҷи фарзӣ ба Арабистони Саудӣ рӯзҳои наздик оғоз мешавад. Ҳар сол зиёда аз шаш ҳазор шаҳрванди Тоҷикистон барои адои ҳаҷи фарзӣ мераванд.
Кумитаи дини Тоҷикистон дар моҳи март нархи ҳаҷи имсоларо 56 ҳазору 800 сомонӣ ё зиёда аз панҷ ҳазор доллар эълон кард. Мақомот ин ниҳод гуфтанд, ки нарх бо Хадамоти зиддиинҳисорӣ мувофиқа шудааст.
Ин пул, ба гуфтаи онҳо, ба харидани билети ҳавопаймо, меҳмонхона, хӯрок, хидмати роҳбаладон, иқомат дар Мино, Арафот ва Муздалифа, қурбонӣ, доруву бима ва боҷи давлатӣ сарф мешавад.
Боздошти 15 шаҳрванди Узбекистон баъди занозанӣ дар Дубай
Дар пайванд ба занозании рӯзи 20-уми апрел дар Дубай 15 шаҳрванди Узбекистонро боздошт кардаанд.
Аҳрор Бурҳонов, сухангӯйи Вазорати корҳои хориҷии Узбекистон, гуфт, ҷониби Имороти Муттаҳидаи Араб ҳодисаро таҳқиқ мекунад.
“Ҳамчунин таъкид шудааст, ки мавридҳои қонуншиканӣ бо ҳузури шаҳрвандони Узбекистон метавонад ба низоми бидуни раводид миёни ду кишвар таъсир расонад", - афзуд, Бурҳонов.
Дар пайи нашри ин хабар дар шабакаҳои иҷтимоӣ сару садое паҳн шуд, ки Имороти Муттаҳидаи Араб вуруди шаҳрвандони Узбекистонро ба Дубай манъ кард.
Сухангӯйи Вазорати корҳои хориҷии Узбекистон ин иттилоъро беасос хонд. Ба гуфтаи вай, низоми бераводид байни Тошканду Дубай ҳанӯз ҳаст.
“Манбаъҳои расмӣ дар бораи ҷорӣ шудани чунин чора иттилое надодаанд,” – илова кард мансабдори узбек.
Аз ин пеш, моҳи марти соли 2025, се шаҳрванди Узбекистонро бо иттиҳоми куштани рӯҳонии исроилӣ Тсви Коган дар Имороти Муттаҳидаи Араб ба қатл маҳкум карданд.
Қирғизистон ба кашидани симхор дар марз бо Тоҷикистон оғоз кардааст
Қирғизистон ба кашидани симхор дар марзаш бо Тоҷикистон оғоз кардааст.
Хабаргузориҳои Қирғизиcтон рӯзи 29-уми апрел бо нашри аксҳо аз ин раванд навиштаанд, ки марзбонон кашидани симхорро дар сарҳад аз ноҳияи Кошмолои вилояти Бодканд шуруъ карданд. Ин минтақа марзи Қирғизистонро аз Тоҷикистону Узбекистон ҷудо мекунад. Дар ин маросим намояндагони Тоҷикистон ва Узбекистон дида нашудаанд.
Оғози симхоркаширо Қамчибек Тошиев, раиси Кумитаи давлатии амнияти миллии Қирғизистон ба гунаи бархат ё онлайнӣ назорат кардааст.
Мақомоти қирғиз гуфтаанд, ки дар марҳилаи аввал беш аз 400 километрро симхор мекашанд ва ин корро то охири имсол бояд ба поён расонанд.
Рӯзи 13-уми март Тоҷикистон ва Қирғизистон пас аз баҳсҳои тӯлонӣ созиши марзиро имзо карданд.
Марзи Тоҷикистону Қирғизистон 1006 киломтер аст ва то моҳи март бисёре аз қитъаҳо баҳсӣ ба ҳисоб мерафтанд.
Борҳо дар нуқтаҳои баҳсӣ ҷанҷол сар зада, боиси кушта ва захмӣ шудани даҳҳо низомӣ ва сокинони маҳаллии ду кишвар шуда буд.
Мақомоти қирғизу тоҷик гуфтанд, ки имзои созишномаи марзӣ ба ин баҳсҳо хотима додааст.
Муҳлати қонунӣ кардани санадҳо барои муҳоҷирон тамдид шуд
Муҳлати қонунигардонии будубош дар Русия барои муҳоҷирон, ки то 30-юми апрел пешбинӣ шуда буд, то 10-уми сентябр тамдид шуд.
Фармонро дар ин бора рӯзи 28-уми апрел Владимир Путин, раисиҷумҳури Русия, имзо кард.
Дар асоси фармони қаблӣ аз 30-юми декабри соли 2024, хориҷиёне, ки дар Русия ғайриқонунӣ кору зиндагӣ доранд, фурсат доштанд, ки аз 1-уми январ то 30-юми апрели соли ҷорӣ санадҳои худро дуруст кунанд ва ё аз ин кишвар берун шаванд.
Сабтином дар идораи муҳоҷират, пешниҳоди маълумоти биометрӣ ва пизишкӣ, шаҳодатномаи донистани забони русӣ ва иҷозаи иқомат, аз шартҳои асосӣ гуфта мешавад.
Ҳамчунин, муҳоҷирон бояд ҷаримаҳо ва пули телефонро пардохт карда бошанд ва аз хадамоти дигари давлатӣ, қарздор набошанд.
Муҳоҷирон баъди ҳамла ба "Крокус" дар моҳи марти соли гузашта аз зиёд шудани рейдҳои пулис ва сахттар шудани қонунҳои муҳоҷират, шикоят доранд.
Владимир Путин хоҳони оташбаси серӯза шуд
Владимир Путин, президенти Русия, дар пайванд ба иди ғалаба дар Ҷанги Дуюми Ҷаҳон оташбаси серӯза эълон кард.
Бино ба хабарномае, ки рӯзи 28-уми апрел дар торнамо ё вебсайти Кремл нашр шуд, аз соати 12-и шаби 8-уми май то 11-уми май ҳамлаи низомиёни Русия ба Украина бас хоҳад шуд. Мақомоти Украина ба изҳороти Кремл ҳанӯз вокуниш накардаанд.
Дар як моҳи охир бори дувум аст, ки Кремл ба оташбас дар Украина даъват мекунад. Оташбаси аввал, ки рӯзи 19-уми апрели имсол барои иди пок ва барои 30 соат эълон шуда буд, пурра риоя нашуд. Русия ва Украина ҳамла ба хоки якдигарро идома доданд.
Ин бор оташбас дар робита ба 80-умин солгарди пирӯзӣ дар Ҷанги Дувуми Ҷаҳон эълон шудааст. Ҷашне, ки ҳар сол Русия ва Украина онро ботантана таҷлил мекунанд.
Ҳар сол дар Майдони Сурхи Маскав дар пайванд ба Иди Ғалаба парад ё гашти низомӣ баргузор мешавад. Соли гузашта дар ин чорабинӣ президентҳои Қазоқистон, Қирғизистон, Тоҷикистон, Узбекистон, Беларус ва Туркманистон ширкат доштанд.
Путин дар солҳои охир иди ғалабаро барои сафед кардани таърихи муосири Русия ва ҳамзамон танқиди ғарб истифода мекунад.
Таҷлили Иди Ғалаба дар ҳоле сурат мегирад, ки аз ҳамлаи бедалели Русия ба Украина, бузургтарин ҷанг дар Аврупо пас аз Ҷанги Дуюми Ҷаҳонӣ, беш аз се сол мегузарад. Талафоти Русия дар ин ҷангро бештар аз ҳар даргирие арзёбӣ мекунанд, ки ин кишвар аз соли 1945 ба ин сӯ дошт.
Президенти Амрико Доналд Трамп қаблан аз раисҷумҳури Русия, Владимир Путин даъват карда буд, ки ба ҷанг поён диҳад ва созиш кунад.
"Беш аз 70 кас ҷон бохт, ҳазор нафар маҷрӯҳ шуд". Дар Бандар-Аббос чӣ гузашт?
Дар таркиши рӯзи 26-уми апрел дар бандари Шаҳид Раҷоӣ маъруф бa Бандар-Аббоси Эрон 75 нафар ҷон бохта, беш аз ҳазор каси дигар маҷрӯҳ шудаанд.
Расонаҳо бо такя ба манобеи худ гуфтанд, маводи кимиёие, ки аз Чин барои сохтани мушак оварда мешуд, таркидааст. Мақомоти Эрон ин иддаоро рад карда, мегӯянд, таҳқиқ ҳанӯз ба поён нарасидааст.
Дар наворҳо дида мешавад, ки дар оғоз як оташи хурде сар мезанад ва пас аз чанде доманаи он васеъ шуда, таркиш ба вуҷуд меояд. Таркиш ва оташу дуди он ба ҳадде буд, ки ҳукумат маҷбур шуд, дари мактабу корхонаҳоро дар ин минатқа бибандад.
Дар ду рӯзи охир талош шуд, ки бо мошинҳои обпош ва чархболҳо оташро хомӯш кунанд, вале ҳанӯз дар маҳалли ҳодиса дуд дида мешавад.
Масъуд Пизишкиён, раисҷумҳури Эрон, ба дидори шахсони маҷрӯҳ рафт: “Дастурот барои пайгирии мушкилот дода шудааст. Мушкилоте, ки ҳаст, талош дорем, ки ҳал кунем.”
Мақомоти Эрон мегӯянд, аз ҳазор шахси маҷрӯҳ ҳудуди дусад нафар дар бемористон бистарӣ ҳастанд.
Бандар-Аббос дар Халиҷи Форс аз муҳимтарин пойгоҳҳои интиқоли молу маҳсулот дар минтақа аст. Аз тариқи ин бандар молу маҳсулоти Эрон ба кишварҳои дигари дунё ва аз он тараф ба Эрон интиқол меёбад. Ҳоло кори ин бандар қатъ шудааст ва маълум нест, кай аз сар гирифта мешавад.
